06.08.2025

Reisebericht | Natur pur in Westkanada!

Schweiz - Calgary

Los geit üses Abentüür! 07:38 fahrt dr Bus und när geit's uf Züri a Flughafä. Bir Gepäckabgab steit dr Reto Lipp hinger üs. Wo ächt dä härä flügt? Ä letschtä Gruess und äs letschts Ässä uf schwiizer Bodä - jedem sis liebstä: McDo, KFC, Thai und indisch. Dr Flüger steit bereit, 15min später aus planet.

Calgary

What a day!
Äm Jetlag sei dank, si mir scho am 05:30 uf. D'Trottoires entlang vor Stampede Paradestrecki si um die Zit bereits vo unmängine Stüeu und Schoulustigä gsöimt gsi, obwouh d'Parade ersch am 09:00 gstartet het.
Am Namittag si mir i Stampede Park, wo's Cowboys und -girls het gha, "soweit das Auge reicht". Mir hei ärä einmaligä Rodeoshow chönnä biwohnä, vo Bareback & Saddle Rodeo über Tie Down Roping, Bull Riding, Steer Wrangling bis hin zu Barrel & Wild Pony Racing isch aues derbi gsi. Äs richtigs Spektaku im GMC Stadion.

Am zwöite Tag hei mir unger angerem d'Skyline vo Calgary bestuunet und am Abä het üs im Stampede Park "THE GREATEST OUTDOOR SHOW ON EARTH" erwartet. Und sie hei nid z'viu versprochä! Nachem Chuckwagon-Rennä, hei sie ä mobili Bühni häräkarret und 2h lang Vougas gäh mit Konzärt, Tanz, Drohnäshow und ämene Füürwärch sondergleichen. Wenn das Füürwärch ar "Grandstand Show" dr Houptgang isch, denn chöi sich au die offizielle 1.-Ougust-Füürwärch ir Schwiz maximau "amuse bouche" nennä. Muess mä gseh ha!!

Calgary - Banff

Mit üsem Mietouto (ä Ford Expedition - äs Schiff vomene Outo, wo ds Lyss ir Tiefgarage niemaus Platz hät) si mir hüt vo Calgary, verbi a dä olympische Skispring-Schanzä, nach Banff gfahrä, wo mir imene wunderschöne Hotel diräkt über dä Boumchronä üses Zimmer hei bezogä. Nach ämene usgiebige Spaziergang dür ds Stedtli mit Lunch und Souvenirshopping, hei mir dr Hotelpool und ds Dampfbad unsicher gmacht und dr Abä ir Lobby mit Drinks und Spieli la usklingä.

Rocky Mountains

"Das Glück dieser Erde liegt auf dem Rücken der Pferde."
Nach üsem 3-tägig Usflug hoch zu Ross dür d'Rocky Mountains, chöi mir das Sprichwort absolut nachävouzieh. Am 08.07.2024, 09:30, hei mir bi dä Warner Stabbles in Banff üsi Gruppä und üser 2 Cowgirls Sarah und Wilby troffä und hei üs mit üsne haarigä Begleiter Levi, Kiwi, Pistol und Possum bekannt gmacht, sowie äm Muli Bugsy, wo ds Zmittag het treit. Nachem ladä und befestigä vo Sattutäschä und Rägäschutz (zum Glück absolut überflüssig gsi) isch es de ou scho los gangä, dür Wäuder und Bäch entlang dr Sundance Range und em Brewster Creek. Am Mittag hei mir feini Steaks vom Grill und verschiedeni Salät chönnä gniesse, bevors witer in Richtig Sundance Lodge isch gangä. Die liegt mitts ir Wiudnis, färnab vo Lärm, Strom und Netz, derfür usgstattet mit freiläbende Murmelis, wo no so gärn dä Ross und Mulis ihres Fuetter stählä.
Nach ämene usgiebigä Zmorgä isch's am 2. Tag no töifer i d'Wiudnis vo dä Rockies gangä, wo sich d'Witti vo dä kanadischä Wäuder und em Outback vou entfautet hei. Troumhaft!!!
Am 3. Tag hei mir üs scho wieder ufä Wäg zrügg i d'Zivilisation gmacht. Dr Lärm vo Highway und Stadt hei mir so gar nid vermisst. Viu schöner isch es äm Raschlä vo dä Bletter im Wind und em Ruuschä vom Gletscherwasser zuezlosä und jegleche Stress hinger sich z'lah.
Natürlech hei üs am Abä, nach jewils 5h rittä, d'Chnöi, ds Füdli u dr Rüggä weh ta. Äs git tatsächlech Musklä, wo mir no nie trainiert hei. Aber au die Strapazä hei sich glohnt. Die wunderbari Natur und Rueh si unbezauhbar und vilich ou ds Wüssä drum, dass mir amene Ort si gsi, wo nur sehr weni Mönschä je härä chömä.
Am Abä hei mir am Lagerfüür jewils zum Dessär Marshmallows brätlet oder mit dä Cowboys Lassowärfä güebt.
Ächts Cowboyfeeling? Check!

Banff - Jasper

Hüt si mir knappi 300km dür d'Nationalpärk vo Banff nach Jasper gfahrä. Aui hei üs profezeit, wie viu Tier mir ungerwägs wärdä gseh, Hirschä, Elchä, Bärä. Und was hei mir schlussändlech aues gsichtet...? Äs Streiffähörnli. 
Derfür si mir ou hüt wiederum mit wunderschöner Landschaft belohnt wordä: Bärgä, Gletscher, Seeä, Flüss und Wasserfäu. Sehr idrucksvou.

Jasper

Ä Cowboy het üs am Lagerfüür dr Tipp gäh, anstatt dr vo Touris überfüut "Lake Louise" gah z'bsueche, ä Wanderig entlang dä "Five Lakes" in Jasper z'ungernäh. Dört heigä mir das Ganzä im Chliformat und mit dütlech weniger Lüt. Gesagt - Getan. Ä wunderschöni ca. 2.5h Wanderig entlang vo 5 blauä, klarä Bärgseeli, wo mä sogar drin cha schwümmä. D'Chipmunks und Eichhörnli si us nächster Nechi z'beobachtä gsi und äs het hert gha, die putzigä Tierli nid z'füettere. Dr Wäg isch ungloublech stoubig gsi, sehr zur Fröid vo Yorick und Thea, wo sich äs Spässli drus hei gmacht, müglechst viu Stoub ufzwirblä.

Edmonton

Gester si mir rund 350km vo Jasper nach Edmonton gfahrä. Zwar hei mir ungerwägs (nach öpä 10km) 2 Hirschä gseh, aber süsch isch d'Strecki, entlang em Yellowhead Highway eher längwilig gsi: Rächts und links Waud - e basta.
Am Abä hei mir eis vo dä best bewärtetschte Restis entdeckt. 4.9 vo 5.0 bi fasch 4k Bewärtigä - so viu Lüt chöu sech nid irre und yap, mir chöi's bestätige.
Edmonton het ä Skyline und sehr vieli chlini Pärkli. Ds wahrä Highlight vor Stadt isch allerdings d'West Edmonton Mall, ds grösstä Ichoufszäntrum vo Nordamerika (isch bis 2004 sogar ds grösstä vor Wäut gsi). Näbst über 150 Lädä git's dört drin ou ä Isbahn, ä Kartbahn, ä Minigolfalag, ä Seelöieshow, ä Wasserpark, äs Multiplexchino und vieles meh - so viu, dass mir üs hüt ufteilt hei und aui äre bevorzugtä Freizitbeschäftigung hei chönnä nachä gah. D'Jungs si gah schiesse, d'Mädels gah shoppä, am Nami si die meiste i Wasserpark.

Lake Gregg

Am Mäntig si mir pünktlech am 08:00 im Hotel in Edmonton vo üsem Tour-Guide Manu abghout wordä und hei üsi Tripgspänndli Maxi und Joel troffä. Nach äre knapp 3h Busfahrt zrügg nach Hinton hei mir dört üsi Tour-Guide Anne und die 6 witere Abentürer, wo bereits sit 8 Täg gmeinsam dür d'Nationalpärks vo Banff und Jasper gwanderet si (Evelyne, Vicky, Thomas, Dani, Raimund & Jeannette), kennäglert. Ä letschti Müglechkeit zum Snacks izchoufä, bevor mir a Lake Gregg si gfahrä und im ruehigä Gwässer hei glehrt ines Kanu izstiege, z'stürä, vo Land ab- und a Land azlegä. Nach äre 1. früschä Nacht im Zäut, mit bitzli Rägä, hei mir ä Vorahnig gha, was üs die nächstä 4 Täg ufem Athabasca River, wiederum färnab vo jeglicher Zivilisation und Telefonnetz, ungfähr wird erwartä.

Athabasca River

Am Zistig isch's so richtig losgangä, nachdäm mir aui notwändigä Utensilie für die nächstä 4 Täg usem Koffer i Wasserbags umpackt und die 7 Kanu mit Zäut, Mattä, Campingstüeuh, Wasserkanister, mit Läbesmittu gfüutä Fesser und Chüeuboxä und dä Wasserbags beladä hei. Ab da hei üs dr Kapitän Matt und dr Kapitän Yorick während 4 Täg rund 180km dr Athabasca River z'dürab bis nach Whitecourt manövriert, dür verschiede schnäui Strömigä, verbi a Brüggäpfiler, Eddies, Lockjams, Gravelbanks und Sweepers. Mittagspousä gmacht und übernachtet hei mir jewils uf ämene Flussinseli. Ungerwägs hei mir die übleche chline Tierli und Reh gseh und sogar ä Wisschopfsteiadler, aber wiedrum ke Bär oder Elch. Dr Tagesablouf isch immer glich und düreorganisiert gsi. Zmorgä ässä, Zäut abbouä, Kanu beladä, paddlä, paddlä, paddlä, landä, Zmittag abladä, chochä und ässä, aues wieder im Kanu befeschtigä, witerpaddlä, äs 7ner Raft biude und sich la triebe, a Land gah, aui Kanus komplett entladä a Land bringä und chehrä, Zäut ufsteue, Badä und chillä, Znacht chochä und ässä und när kniffligi Lagerfüürrätsu lösä, fischä oder philosophiere - jede wiener grad lustig isch. Üsi 2 Tour-Guides Anne & Manu hei aues gäh und täglech 3 warmi, abwächsligsrichi Mauhzitä uf offenem Füür zuebereitet. Aui Abentürer und Abentürerinne hei jewils flissig mitghoufä Füürhouz z'sagä, Gmües z'schnipplä oder abzwäschä. Allerdings si die 4 Täg nid mit ämene gmüetleche Aaräböötlä z'verglichä. Nei, mir hei täglech 4 - 5h aktiv paddlet. Wie asträngend, wenn mä sich das nid gwöhnt isch! Wiederum hei sich Muskugruppene bemerkbar gmacht, wo schinbar sit Jahrä nüm oder no nie si trainiert wordä. Derzue si die früschä und unbequeme Nächt im Zäut cho, wo wenig zur Erholig fürä nächst Tag hei bitreit. Da mir nur 2 würklech gueti Schlafseck hei derbi gha, hei d'Eutere sich mit Thermoungerwösch, Chappä und zibelegschichtetem Chleidigsstiu dür d'Nächt ghoufä.
 

Victoria

Mit em Flug vo Edmonton nach Vancouver, am 20.07.2024, hei mir einersits d'Zitzonä gwächslät und si itz ganzi 9h hinger dri und anderersits ou dr Bundesstaat. Ab sofort si mir nüm in Alberta, sondern in British Columbia ungerwägs. Vom Flughafä Vancouver isch es mitem Mietouto, dieses Mau chli äs kompakters Gfährt (Chrysler Pacifica), diräkt uf d'Fährä ab Tsawwassen nach Swartz Bay uf Vancouver Island gangä. Am Sunntig hei mir Victoria fasch 6h lang z'Fuess erchundet. Mir si vo Chinatown mit dr Fan Tan Alley (die ängsti Gass vo Victoria), via Regierigsgeböide (wo usgseht wienes mini Bundeshuus und grad äs Velorennä ringsum het stattgfungä), zum Fisherman's Wharf (äs schwümmends Dörfli mit viele Takeaways/Restis), zum Ogden Point & Breakwater gloffä, wo mir ä Seehund hei gsichtet, u när witer dürä wunderschön Beacon Hill Park, wo mä die gfideretä Fründä fasch het chönnä berüehre. Gässä hei mir i denä 2 Täg ou nid zweni. Da ds Hotel säuber ke Zmorgämüglechkeit abotä het, si mir ines typisches Diner gangä. Wow, was für Porzionä und Gschmäcker üs da erwartet hei.

Tofino

Tofino isch für üs äs tierisches Erläbnis gsi. Nach äre doch eher längä Areis vo Victoria, wo sich mit aunä Pouse uf 7h erstreckt het, si mir mit äre wunderschöne Front-Row Lodge mit Galerie und Blick ufä Pazifik belohnt wordä, inkl. Jacuzzi uf dr Terrassä. Ebbe und Fluet si hie sehr usgeprägt. So hei mir am Morgä während dr Ebbe am Strand vieli, süsch meerbedeckti Kreaturä chönnä bestuunä: Tusigi Muschlene, wo a dä Feusä chläbä, Anemonä (oder so), Chräbsli und hunderti Seestärnä. Am Nami hei mir ä Whale-Watching-Tour gmacht und üsä Kapitän het aui Versteck vo dä verschiedene Meeresbewohner kennt. Zersch hei mir ä Gruppä Meerotter chönnä beobachtä bevor mir uf ds offnä Merr usä si, wo tatsächlech ä Grauwau und 2 Buckelwale in unmittubarer Nöchi vo üsem Boot si gschwummä. Üsserscht beidruckend, die sanftä Riese. Ufem Rückwäg i d'Bucht vo Tofino si mir ou no amene Feus verbi cho, wo ä stattleche Seelöi mit sim Harem tronet het. Am 2. Tag si d'Jungs am Morgä gah sörfä und d'Mädels gah Muschle sueche. Am Nami hei mir ä Spaziergang dürne schöne Waud entlang em Meer gmacht bis is Zäntrum vo Tofino.

Vancouver

Üsi letschti Stazion in Kanada isch VANCOUVER gsi. Während 3 Täg hei mir vieli Eggä und Sehenswürdigkeite mit ungerschiedleche Verchehrsmittu erchundet: - ä Velotour dürä Stanley Park mit ämene Bsuech im Aquarium - zum Public Market per Wassertaxi uf Granville Island - dür die verscheidene Viertu Yaletown, Gastown und Chinatown z'Fuess - ä schnäuä Trip mitem Speedboat dürä False Creek. Während üsere Erchundigstour si mir amene Fiumset verbi cho, hei ämene Gratiskonzärt vom Vancouver Metropolitan Orchester chönnä biwohnä, hei aber ou d'Schattäsitä vo sore Grossstadt ir East Hastings Street mitübercho. Aues i auem ä spannendä und würdigä Abschluss vo üsere Reis, wiederum mit viunä kulinarischä Highlights, sogar mit ämene Gratisznacht all inclusive... (wöu sie eis vo üsnä Täuer hei la gheiä u mir dür das wit überne Stung uf üses Ässä hei müesse wartä. Ir Schwiz hättä mir äuä äs Kaffi und äs trochnigs Chüechli aus Entschuldigung übercho)